श्रीगणपत्यथर्वशीर्षम् Shri Ganapatya tharva shirsham
**श्रीगणपत्यथर्वशीर्षम्**
ॐ भद्रं कर्णेभिरिति शान्तिः। हरिः ॐ॥
नमस्ते गणपतये। त्वमेव प्रत्यक्षं तत्त्वमसि।
त्वमेव केवलं कर्तासि। त्वमेव केवलं धर्तासि। त्वमेव केवलं हर्तासि। त्वमेव सर्वं खल्विदं ब्रह्मासि। त्वं साक्षादात्मासि नित्यम्। ऋतं वच्मि। सत्यं वच्मि।
अव त्वं माम्। अव वक्तारम्। अव श्रोतारम्। अव दातारम्। अव धातारम्। अवानूचानमव शिष्यम्। अव पश्चात्तात्। अव पुरस्तात्। अव चोत्तरात्तात्। अव दक्षिणात्तात्। अव चोर्ध्वात्तात्। अवाधरात्तात्। सर्वतो मां पाहि पाहि समन्तात्॥
त्वं वाङ्मयस्त्वं चिन्मयः। त्वमानन्दमयस्त्वं ब्रह्ममयः। त्वं सच्चिदानन्दाद्वितीयोऽसि। त्वं प्रत्यक्षं ब्रह्मासि।
त्वं ज्ञानमयो विज्ञानमयोऽसि। सर्वं जगदिदं त्वत्तो जायते।
सर्वं जगदिदं त्वत्तस्तिष्ठति। सर्वं जगदिदं त्वयि लयमेष्यति।
सर्वं जगदिदं त्वयि प्रत्येति। त्वं भूमिरापोऽनलोऽनिलो नभः।
त्वं चत्वारि वाक्पदानि। त्वं गुणत्रयातीतः। त्वं कालत्रयातीतः।
त्वं देहत्रयातीतः। त्वं मूलाधारस्थितोऽसि नित्यम्। त्वं शक्तित्रयात्मकः।
त्वां योगिनो ध्यायन्ति नित्यम्।
त्वं ब्रह्मा त्वं विष्णुस्त्वं रुद्रस्त्वमिन्द्रस्त्वमग्निस्त्वं वायुस्त्वं सूर्यस्त्वं चन्द्रमास्त्वं ब्रह्म भूर्भुवः सुवरोम्॥
**मन्त्रस्वरूपम्**
गणादिं पूर्वमुच्चार्य वर्णादिं तदनन्तरम्।
अनुस्वारः परतरः। अर्धेन्दुलसितम्॥१॥
तारेण रुद्धम्। एतत्तव मनुस्वरूपम्।
गकारः पूर्वरूपम्। अकारो मध्यमरूपम्।
अनुस्वारश्चान्त्यरूपम्। बिन्दुरुत्तररूपम्।
नादः सन्धानम्। संहिता सन्धिः। सैषा गणेशविद्या। गणक ऋषिः। निचृद्गायत्री छन्दः। श्रीमहागणपतिर्देवता। ॐ गं (गणपतये नमः)।
**ध्यानमन्त्रः**
एकदन्ताय विद्महे वक्रतुण्डाय धीमहि। तन्नो दन्ती प्रचोदयात्॥
एकदन्तं चतुर्हस्तं पाशमङ्कुशधारिणम्।
अभयं वरदं हस्तैर्बिभ्राणं मूषकध्वजम्॥
रक्तं लम्बोदरं शूर्पकर्णकं रक्तवाससम्।
रक्तगन्धानुलिप्ताङ्गं रक्तपुष्पैः सुपूजितम्॥
भक्तानुकम्पिनं देवं जगत्कारणमच्युतम्।
आविर्भूतं च सृष्ट्यादौ प्रकृतेः पुरुषात्परम्॥
एवं ध्यायति यो नित्यं स योगी योगिनां वरः।
**नमस्कारमन्त्रः**
नमो व्रातपतये। नमो गणपतये।
नमः प्रमथपतये।
नमस्तेऽस्तु लम्बोदरायैकदन्ताय विघ्नविनाशिने।
शिवसुताय श्रीवरदमूर्तये नमो नमः॥
**फलश्रुतिः**
एतदथर्वशिरो योऽधीते स ब्रह्मभूयाय कल्पते।
स सर्वविघ्नैर्न बाध्यते। स सर्वतः सुखमेधते।
स पञ्चमहापातकोपपातकात् प्रमुच्यते।
सायमधीयानो दिवसकृतं पापं नाशयति।
प्रातरधीयानो रात्रिकृतं पापं नाशयति।
सायं प्रातः प्रयुञ्जानोऽपापो भवति।
धर्मार्थकाममोक्षं च विन्दति।
इदमथर्वशीर्षमशिष्याय न देयम्।
यो यदि मोहाद्दास्यति स पापीयान् भवति।
सहस्रावर्तनाद्यं यं काममधीते तं तमनेन साधयेत्।
अनेन गणपतिमभिषिञ्चति स वाग्मी भवति।
चतुर्थ्यामनश्नञ्जपति स विद्यावान् भवति।
इत्यथर्वणवाक्यम्।
ब्रह्माद्याचरणं विद्यात्। न बिभेति कदाचनेति।
यो दूर्वाङ्कुरैर्यजति स वैश्रवणोपमो भवति।
यो लाजैर्यजति स यशोवान् भवति। स मेधावान् भवति।
यो मोदकसहस्रेण यजति स वाञ्छितफलमवाप्नोति।
यः साज्यसमिद्भिर्यजति स सर्वं लभते स सर्वं लभते।
अष्टौ ब्राह्मणान् सम्यग्ग्राहयित्वा सूर्यवर्चस्वी भवति।
सूर्यग्रहे महानद्यां प्रतिमासन्निधौ वा जप्त्वा सिद्धमन्त्रो भवति।
महाविघ्नात् प्रमुच्यते। महापापात् प्रमुच्यते। महादोषात् प्रमुच्यते।
स सर्वविद्भवति। स सर्वविद्भवति। य एवं वेद॥
ॐ भद्रं कर्णेभिरिति शान्तिः॥
**॥ इति श्रीगणपत्यथर्वशीर्षम् सम्पूर्णम्॥**
श्रीगणपत्यथर्वशीर्षम् Shri Ganapatya tharva shirsham
Shri Ganapatyatharvashirsham
Om bhadram karnebhihiti shaantih. Harih Om.
Namaste Ganapataye. Tvameva pratyaksham tattvamasi.
Tvameva kevalam kartasi. Tvameva kevalam dhartasi. Tvameva kevalam hartasi. Tvameva sarvam khalvidam brahmasi. Tvam saakshadaatmaasi nityam. Ritam vachmi. Satyam vachmi.
Ava tvam maam. Ava vaktaaram. Ava shrotaaram. Ava daataaram. Ava dhaataaram. Avaanoochaanamava shishyam. Ava pashchaattaath. Ava purastaath. Ava chottaaraattaath. Ava dakshinaattaath. Ava chordhvaattaath. Avaadharaattaath. Sarvato maam paahi paahi samantaath.
Tvam vaangmayastvam chinmayah. Tvamaanandamayastvam brahmamayah. Tvam sachchidaanandaadvitiyo’si. Tvam pratyaksham brahmaasi.
Tvam jnyaanamayo vijnyaanamayo’si. Sarvam jagadidam tvatto jaayate.
Sarvam jagadidam tvattastishthati. Sarvam jagadidam tvayi layameshyati.
Sarvam jagadidam tvayi pratyeti. Tvam bhoomiraapo’nalo’nilo nabhah.
Tvam chatvaari vaakpadaani. Tvam gunatrayaateetah. Tvam kaalatrayaateetah.
Tvam dehatrayaateetah. Tvam moolaadhaarasthito’si nityam. Tvam shaktitrayaatmakah.
Tvaam yogino dhyaayanti nityam.
Tvam Brahmaa tvam Vishnustvam Rudrastvam Indrastvam Agnistvam Vaayustvam Sooryastvam Chandramaastvam Brahma bhoorbhuvah suvarom.
Mantrasvaroopam
Ganaadim poorvamuchchaarya varnaadim tadanantaram.
Anusvaarah paratarah. Ardhendulasitam. (1)
Taarena ruddham. Etattava manusvaroopam.
Gakaarah poorvaroopam. Akaaro madhyamaroopam.
Anusvaarashchaantyaroopam. Binduruttararoopam.
Naadah sandhaanam. Samhitaa sandhih. Saishaa Ganeshavidyaa. Ganaka Rishih. Nichridgaayatri chhandah. Shri Mahaaganapatirdevataa. Om Gam (Ganapataye namah).
Dhyaanamantrah
Ekadantaaya vidmahe vakratundaaya dheemahi. Tanno dantee prachodayaat.
Ekadantam chaturhastam paashamankushadhaarinam.
Abhayam varadam hastairbibhraanam mooshakadhvajam.
Raktam lambodaram shoorpakarnakam raktavaasasam.
Raktagandhaanuliptaangam raktapushpaih supoojitam.
Bhaktanukampinam devam jagatkaaranamachyutam.
Aavirbhootam cha srishtyaadau prakriteh purushaatparam.
Evam dhyaayati yo nityam sa yogee yoginaam varah.
Namaskaaramantrah
Namo vraatapataye. Namo Ganapataye.
Namah pramathapataye.
Namaste’stu lambodaraayaikadantaaya vighnavinaashine.
Shivasutaaya shreevaradamoorthaye namo namah.
Phalashrutih
Etadatharvashiro yo’dheete sa brahmabhooyaaya kalpate.
Sa sarvavighnairna baadhyate. Sa sarvatah sukhamedhate.
Sa panchamahaapaatakopapaatakaat pramuchyate.
Saayamadheeyaano divasakritam paapam naashayati.
Praataradheeyaano raatrikritam paapam naashayati.
Saayam praatah prayunjaano’paapo bhavati.
Dharmarthakaamamoksham cha vindati.
Idamatharvashiramashishyaaya na deyam.
Yo yadi mohaaddaasyati sa paapeeyaan bhavati.
Sahasraavartanaadyam yam kaamamadheete tam tamanena saadhayet.
Anena Ganapatimabhishinchati sa vaagmee bhavati.
Chaturthyaamanashnanjapati sa vidyaavaan bhavati.
Ityatharvana vaakyam.
Brahmaadyaacharanam vidyaat. Na bibheti kadaachaneti.
Yo doorvaankurairyajati sa Vaishravanopamo bhavati.
Yo laajairyajati sa yashovaan bhavati. Sa medhaavaan bhavati.
Yo modakasahasrena yajati sa vaanchitaphalamavaapnoti.
Yah saajyasamidbhiryajati sa sarvam labhate sa sarvam labhate.
Ashtau braahmanaan samyaggraahayitvaa sooryavarchasvee bhavati.
Sooryagrahe mahaanadyaam pratimaasannidhau vaa japtvaa siddhamantro bhavati.
Mahaavighnaat pramuchyate. Mahaapaapaat pramuchyate. Mahaadoshaat pramuchyate.
Sa sarvavidbhavati. Sa sarvavidbhavati. Ya evam veda.
Om bhadram karnebhihiti shaantih.
Iti Shri Ganapatyatharvashirsham Sampoornam.
श्रीगणपत्यथर्वशीर्षम् Shri Ganapatya tharva shirsham
